Forvarnardagurinn er helgaður baráttunni gegn fíkniefnum

Neysla fíkniefna hefur á undanförnum árum orðið vaxandi vandamál í okkar litla samfélagi. Brýnt er að allir taki höndum saman í baráttunni gegn þeim.

Fíkniefnin geta eyðilagt líf ungmenna, valdið óbætanlegu tjóni á líkama og sál og skapað langvarandi erfiðleika og þjáningar fyrir fjölskyldu, ættingja og vini.

Þótt ekki sé til neitt töfraráð sýna íslenskar rannsóknir að þrjú einföld heillaráð geta, sé þeim fylgt, minnkað verulega líkurnar á að börn og unglingar hefji neyslu fíkniefna.

Heillaráðin voru send inn á öll heimili í landinu haustið 2006 og sérstök dagskrá sem byggir á þeim hefur verið haldin í 9. bekk allra grunnskóla hvert haust síðan. Gerðar hafa verið sérstakar auglýsingar sem byggja á niðurstöðum verkefnavinnu ungmennanna.

Heillaráðin þrjú eru byggð á áralöngum rannsóknum fræðimanna við Háskóla Íslands og Háskólann í Reykjavík á hegðun ungmenna og árangursríkum forvörnum. Þær sýna að samverustundir fjölskyldunnar, þátttaka í skipulögðu íþrótta- og æskulýðsstarfi og að sniðganga áfengi sem lengst, dregur til muna úr líkum á því að ungmenni hefji neyslu fíkniefna.

• Verjum sem mestum tíma saman. Klukkutíma samvera foreldra og barna á hverjum degi getur ráðið úrslitum.
• Hvetjum börn og unglinga til þátttöku í skipulögðu íþrótta- og æskulýðsstarfi. Okkar stuðningur skiptir sköpum.
• Því lengur sem unglingar sniðganga áfengi því ólíklegra er að þeir ánetjist fíkniefnum. Hvert ár skiptir máli.
  

Forvarnardagurinn er haldinn að frumkvæði forseta Íslands. Aðstandendur Forvarnardagsins, sem skipulagður er með stuðningi Actavis, eru Íþrótta- og Ólympíusamband Íslands, Ungmennafélag Íslands, Bandalag íslenskra skáta, Samband íslenskra sveitarfélaga og Reykjavíkurborg.