Forvarnardagur 2011 verður haldinn miðvikudaginn 5. október. Dagurinn er helgaður nokkrum heillaráðum sem geta forðað börnum og unglingum frá fíkniefnum, ráðum sem eiga erindi við allar fjölskyldur í landinu.Forvarnardagurinn er haldin að frumkvæði forseta Íslands og Actavis er styrktaraðili. Bryddað er upp á þeirri nýbreytni í ár, að haldin er myndbandasamkeppni á Fésbókinni, þar sem krakkarnir geta sent inn myndbönd sem tengjast markmiði dagsins. Auk þess eru framhaldsskólarnir með í fyrsta sinn, en fram til þessa hefur Forvarnardagurinn eingöngu verið í 9. og 10. bekk. Rannsókn og greining hefur haft með höndum kannanir og skýrslugerð sem tengjast Forvarnardeginum. Fyrirtækið er rannsóknamiðstöð sem sérhæfir sig í rannsóknum á ungu fólki á Íslandi og erlendis og leiðir rannsóknaverkefni á þeim vettvangi í yfir 20 borgum í Evrópu. Meðal þess sem rannsóknir þeirra hafa sýnt er að:

• unglingar foreldra sem vita gjarnan hvar þeir eru á kvöldin og með hverjum, eru ólíklegri til að neyta fíkniefna en þeir unglingar sem eru undir minna eftirliti
• því meiri tíma sem foreldrar verja með unglingum því ólíklegra er að þeir leiðist út í fíkniefnaneyslu
• þeir unglingar sem telja sig auðveldlega geta fengið stuðning frá foreldrum sínum eru ólíklegri en aðrir til að leiðast inn á braut fíkniefnaneyslu
• unglingar sem stunda skipulagt íþrótta-og æskulýðsstarf undir leiðsögn ábyrgra aðila eru ólíklegri til að leiðast út í fíkniefnaneyslu eða aðra óæskilega hegðun
• því lengur sem unglingar sniðganga áfengi því ólíklegra er að þeir ánetjist fíkniefnum, hvert ár skiptir á máli