flvMovieUrl: Actavis kaupir lyfjarannsóknarfyrirtæki á Indlandi

Ísland


Fréttatilkynningar

08 FEB 2005 / Aðrar

 

Actavis kaupir lyfjarannsóknarfyrirtæki á Indlandi

Forseti Íslands opnar formlega lyfjaverksmiðju Emcure í Pune.Alþjóðlega lyfjafyrirtækið Actavis Group hefur aukið umsvif sín á Indlandi með kaupum á lyfjarannsóknafyrirtækinu Lotus Laboratories (Lotus) fyrir um 1,6 milljarða ísl. króna, eða um 20 milljónir evra. Kaup Actavis eru ákveðnum skilyrðum háð, en gert er ráð fyrir að gengið verði frá kaupsamningi á næstu vikum. Þá hefur Actavis greint frá samstarfssamningi við indverska samheitalyfjafyrirtækið Emcure Pharmaceuticals (Emcure) um framleiðslu á samheitalyfjum, þróuð af Actavis.

Ólafur Ragnar Grímsson, forseti Íslands, heimsótti Bangalore á Indlandi síðastliðinn sunnudag þar sem undirrituð var yfirlýsing um kaup Actavis á  Lotus. Þá opnaði forsetinn í gær lyfjaverksmiðju í Pune en á sama tíma var gerður samstarfssamningur milli Actavis og Emcure. Forseti Íslands skoðaði einnig ásamt forystumönnum Actavis önnur lyfjafyrirtæki og fyrirtæki á sviði erfðagreiningar í Bangalore og Hyderabad. Í för með forseta Íslands var Róbert Wessman forstjóri Actavis, Ashok Narasimhan og G. R. S. Raghavan, stjórnendur Actavis með aðsetur í Lundúnum og á Indlandi.

230 manns starfa hjá Lotus

Lotus var stofnað árið 2001 og er með höfuðstöðvar í Bangalore. Hjá félaginu starfa um 230 manns. Félagið sérhæfir sig í klínískum rannsóknum á aðgengi lyfja, milliverkunum þeirra og læknisfræðilegum prófunum. Ekki er gert ráð fyrir að kaupin hafi fjárhagsleg áhrif á rekstur samstæðunnar til skamms tíma litið en komi þó til með að lækka þróunarkostnað félagsins til lengri tíma. Þá munu kaupin styðja við sókn Actavis inn á bandaríska markaðinn.

Frá undirritun yfirlýsingar um samstarf Actavis og Emcure. Þá hefur Actavis greint frá samstarfssamningi við indverska samheitalyfjafyrirtækið Emcure Pharmaceuticals (Emcure), sem snýr að framleiðslu á fjórum samheitalyfjum fyrir Bandaríkjamarkað. Samningurinn tryggir lágan framleiðslukostnað á þessum vörum, sem hafa verið þróaðar af sérfræðingum á þróunarsviði Actavis og verða markaðssettar í Bandaríkjunum. Róbert Wessman, forstjóri Actavis, segir að kaupin á Lotus og samstarfssamningur samstæðunnar á Indlandi sé hluti af stefnu félagsins um að nýta sérþekkingu og lágan framleiðslukostnað á Indlandi og styðja þannig við vöxt félagsins. Þá tryggja kaupin á Lotus fyrsta flokks aðstöðu fyrir klínískar rannsóknir á Indlandi.

  • til baka
  • prenta
  • senda

Nýjar fréttir