Anastrozol Actavis er krabbameinslyf og er ætlað til meðferðar við langt gengnu brjóstakrabbameini hjá konum eftir tíðahvörf. Lyfið er öflugur og mjög sértækur arómatasahemill sem ekki inniheldur stera. Eftir tíðahvörf hjá konum myndast estradíól aðallega með ummyndun andróstenedíóns í estrón fyrir tilstilli arómatasaensímfléttu í útlægum vefjum. Estrón ummyndast síðan í estradíól en sýnt hefur verið fram á jákvæð áhrif þess að draga úr blóðþéttni estradíóls hjá konum með brjóstakrabbamein.