Ramíl

Ábendingar:

Ramíl inniheldur virka efnið ramipríl sem tilheyrir flokki svokallaðra ACE-hemla. Lyf í þessum flokki hamla myndun angíótensíns II, eins öflugasta æðaþrengjandi efnis í líkamanum. Auk æðaþrengjandi áhrifa minnkar angíótensín II vatnsútskilnað í nýrum, og það eykur rúmmál blóðs og stuðlar frekar að því að blóðþrýstingur hækkar. Lyfin hindra einnig niðurbrot æðavíkkandi efnis í líkamanum, bradýkíníns. Lyfið veldur æðavíkkun og eykur útskilnað vatns út úr líkamanum og lækkar þannig blóðþrýsting og dregur úr álagi á hjartað.
Ramíl er notað gegn háþrýstingi og til þess að draga úr hættu á kransæðastíflu, heilablóðfalli eða dauðsföllum af völdum hjarta- og æðasjúkdóma hjá sjúklingum með kransæðasjúkdóma eða sykursýki af gerð 2 ásamt fleiri áhættuþáttum.
Ramíl getur einnig verndað nýrun og seinkað nýrnabilun hjá sjúklingum með nýrnasjúkdóm.

• 
• 
•